2018/09/24

Okupatu Gasteiz Egunaren debekua “zentsura politikotzat” jo dute, urriaren 6an Gasteizera joateko deia mantentzearekin batera

“2005ean Alonsok ez zuen Gaztetxe Eguna debekatu; 2008an Lazcozek ez zuen Piztu Gasteiz Eguna debekatu; 2015ean Marotok ez zuen Gora Gasteiz Eguna debekatu. Antzeko formatua du okupaTU Gasteiz Egunak. Zergatik guri bai?”, galdetu diote Gasteizko Udalari. Urriaren 6an Gasteizko kaleak betetzeko deia egin dute, nahiz eta behin betiko egitaraua aurrerago egingo duten publiko.



Aurreko asteartean debekuaren berri eman ostean, OkupaTU Gasteiz dinamikako kideek prentsa agerraldia eskaini dute ostiralean Gasteizko Udaletxearen aurrean. Lehenik eta behin, urriaren 6ko eguna nola planteatu zuten ekarri dute gogora: urtarrilean eguna gordetzeko deia egin zuten, martxoan eguna iragartzeko kalean zeuden eta apirilean baimen guztiak eskatuta. Zentzu horretan, Gasteizeko kolektibo ezberdinen parte hartzea bilatu eta lortu dutela nabarmendu dute, bertako kultura bultzatu nahi duen egitarau bat aurkeztuz orain dela hiru aste.

Egitaraua aurkeztu eta ordu gutxira, aldiz, Udalaren deia: baimenak atzera bota zituzten, “baina euren borondate ona nabarmentzen zuten, Rafa Plaza erabiltzen uzten zigutelako. Santa Maria Plaza, Kutxilleria Kalea, Burulleria Plaza, Matxete Plaza eta Etxanobe Parkea erabiltzeko baimenak, aldiz, ez zituzten onartzen”. Alegia, eskatutako plaza guztietatik, bakarra, Gaztetxeari itsatsita.

Urgentziazko bilera bat eskatu zuten OkupaTU Gasteizkoek, baina Urtaranen Gobernuak jada bilera burutu zuela esan zien, haiekin kontatu gabe. Beste bat jartzea lortu eta azkenean egin zuten, aurreko irailaren 18an, asteartean.

Udalaren gezurra: “Gasteizen ez da inoiz egon hainbeste plaza erabili nahi dituen jaialdirik”

Udalarekin egindako bilera ordu eta erdi luzatu zen. Udalaren partetik, Iñaki Prusilla Ingurumen eta espazio publikoaren saileko zinegotzia eta Ainhoa Etxeandia Ingurumen eta Espazio Publikoaren zuzendaria egon ziren. “Ez da hiriarentzat ekitaldi bat”, argudiatu zieten orduan, euren jarrera momentu baten ere aldatu gabe. “Enpresa pribatuekin konparatu gintuzten, eta hauek egiten duten espazio publikoaren erabilerarekin”.

“Ausartu ziren esatera Gasteizen ez dela inoiz egon hainbeste plaza erabili nahi dituen jaialdirik”. Orduan gogoratu zieten, besteak beste, 2005ean Alonsok ez zuela Gaztetxe Eguna debekatu; 2008an Lazcozek ez zuela Piztu Gasteiz Eguna debekatu eta 2015ean Marotok ez zuela Gora Gasteiz Eguna debekatu. “Ikustekoa zen euren aurpegia beste jaialdi batzuen egitaraua erakutsi genienean, kasu batzuetan guk eskatutako plaza kopurua baino gehiago erabili izan baitzen”.

OkupaTU Gasteizko kideek emandako argudioek, ordea, ez zuten ezertarako balio izan. “Altxa, eta joan egin ziren bilera amaitutzat emanda”. Hala ere, nabarmendu nahi izan duten detailetxo bat ere eman dute jakitera: kolektiboen espazioak (Auzolana, Gaztetxea, Errekaleor eta Hala Bedi) erabiltzera “animatu” zituzten, bertan baimenak ez direla beharrezkoak argudiatuz eta, adibidez, herri bazkari bat egiteko, edo umeentzako txoko bat jartzeko leku ona izan zitekeela. “Nor uste dute direla eurek abandonatu eta herri ekimenak berreskuratu dituen espazio hauen kudeaketaz hitz egiteko?”, galdetu dute.

Salatu dutenez, Udaleko zerbitzu juridikoen aholku bat da ekimena debekatzea, izena argudituta. “Badakigu ez dagoela inongo aitzakia teknikorik plazen baimenenak ukatzeko, ukatzeko arrazoi bakarra izena da; horrela jakinarazi digute bai modu informalean, bai formalean ere”. Izan ere, Udaleko teknikoekin hilabete guzti hauetan zehar izandako harremana “oso positiboa” izan dela baloratu dute, etengabeko komunikazioa izanik eta dena ondo egon zedin erraztasunak ipiniz.

Erabaki politikoa, orain ospakizun eta erantzun bat izango den egunerako

Hedabide ezberdinetan, baimenak ukatzeko arrazoia urriaren 6an beste ekimen batzuk daudela izan da Urtaranen Gobernuaren arrazoia. Ezkutatu egin dute, ordea, zein espazio dauden hartuta, eta noiz eskatu zituzten hauek erabiltzeko baimenak. “Honekin, edozein negoziaziotarako ateak itxita utzi dizkigute. Guk asmo garbia adierazi dugu hitz egiteko eta ekitaldi batzuk beste leku batzuetan kokatzeko, baina halakorik ez dute esan prentsan. Euren proposamena, hauxe: plaza bakarra erabiltzeko baimena dugu egitarau osoa egiteko”.

“Erabaki politiko” baten aurrean gaudela uste dute Hala Bedik, Gaztetxeak, Auzolanak eta Errekaleorrek. Horrekin batera, baimenak orain dela 6 hilabete baino gehiago eskatuta zeudela gogoratu dute: “Honek guztiak argi eta garbi erakusten digu zentsura politiko baten aurrean gaudela. Honek Alfonso Alonsoren jarrera gogorarazten digu: “Ez zait gustatzen, eta bota egingo dut””, Gasteizko Gaztetxearen kontrako adierazpenak zeintzuk izan ziren gogoratuz.

“Ez ginen jaio inoren gustuko izateko”

Alonsorekin hitzekin konparatu, oraingo honetan “ez da egingo, ez zaidalako gustatzen, eta hauteskunde urtean gaudelako” izango zela uste dute. Horri erantzuteko, ospakizun eguna izan behar zena, erantzun bat emateko eguna ere izango dela baiezttau dute. “Ez dinamikak berak jasandako erasoarengatik, baizik eta zentzura politiko hau aurrekaritzat hartu daitekeelako beste herri ekimen eta jaialdietan. Ez dugu onartuko. Uste dugu erantzukizun kolektibo bat daukagula, parte hartzen dugun kolektiboetatik harago doan erantzukizun kolektiboa”.

“Eskubide kontua da urriaren 6koa. Kolektibook ez ginen jaio inoren gustuko izateko, ez atzean dugun honena -Udala-, ezta beste edozeinena ere”. Kolektibo hauek, “kaletik eragin eta eraldatzeko jaio ginen, belaunaldiz belaunaldi, kontzertuz kontzertu, erakusketaz erakusketa edota programaz programa. Gasteizek erakutsi du zertarako den gai, eta erakutsiko du berriz. Hori da balio digun legitimitatea, eta ez hain urruti geratzen zaigun instituzioena”.

“OkupaTU Gasteiz Eguna egingo da”

OkupaTU Gasteiz Eguna egingo dela baieztatu dute antolatzaileek. Adierazi dutenez, “zaplazteko” hau jaso ostean “indartuta atera gara” eta azken orduetan kultura eta kirol arlotik dozenaka atxikimendu jasotzen ari direla eman dute jakitera, datozen egunetan publiko egingo dituzten atxikimenduak.

“Urriaren 6an ikusiko dugu elkar. Eta egun honen ostean ere bai. Eskubide kontu baten aurrean gaude: ezin gara etxean geratu, eta are gutxiago isilik”.

2018/09/16

Iraultza Txikien Akanpada aurkeztu dute eta Euskal Herri osoko herritarrei bertaratzeko deia luzatu

[argia.eus-etik ateratako berria]
[Prentsaurrekoa osorik]

Datorren irailaren 21ean ostiralarekin hasi eta igandera arte Iraultza Txikien Akanpada antolatu du Lurralde Askea mugimenduak Gipuzkoako Zubieta herrian bertan. Egitaraua eta informazio teknikoa jakitera eman dute ostegunean egindako prentsaurrekoan.


Mahaian haurren jostailuak, baserritik ekarritako barazkiak eta desobedientziari buruzko liburuak zituztela aurkeztu dute Iraultza Txikien Akanpada (ITA) ostegunean Zubietan. Datorren irailaren 21ean ostiralarekin hasi eta igandera arte luzatuko da "bestelako Euskal Herri bat amesten duten herritar eta herri mugimenduei" zuzendutako ekimena. "Bertan konplizitateak eraiki, elkarrekin hausnartu eta konspiratu, egin dezakeguna irudikatu eta alternatibak praktikan jarriko ditugu. Hala ere, batez ere, adin guztietako herritarrok gozatu egin nahi dugu elkarren konpainian", adierazi dute.

Bizitza erdigunean jarriko dutela esan dute, eta eremua antipatriarkala, antikapitalista, komunitarioa, autoeratua, autokritikoa, borrokalaria eta alaia izatea nahi dutela.

Asteburua iragartzeko spot hau kaleratu dute prentsaurrekoarekin batera.



Eztabaida, tailer eta mahai-inguru franko

Astebururako egitarau mardula prestatu dute, "denoi eragiten diguten eta patxadaz lantzeko aukera gutxi izaten dugun gaiez hausnartzeko" zortzi saio.

Kanpaldiko lehena, ostiralean 19:00etan, “Lurrikaren erdian gu berri bat?” mahai ingurua izango da Euskal Herriko Eskubide Sozialen Karta, Emakumeen Mundu Martxa, Amankomunak eta Hiritarron Harrera sarearekin.

Larunbatean bai goizean eta baita arratsaldean ere, hainbat saio izango dira aldi berean, eta kanpaldian parte hartuko duten kideek aukeratu egin beharko dute nora jo.

10:00etan "Herri mugimenduen eta instituzioen arteko harremanak, ezinak eta eginak" saioa izango da, EH Bilduko Larraitz Ugarte, Orain Baiko Laura Perez, Iruñeko Maravillas gaztetxea eta Medeak-eko Josebe Iturriozekin.

Ordu berean hasiko da "Eraso matxistak gure espazioetan" saioa. Bi azpisaiotan banatuko dira, biak ala biak, ez mixtoak. Emakumeentzat* "Trapu zikinak aztergai", Bilgune Feminista, Ezker Abertzalea eta Joxemi Zumalabeko kideekin; gizonezkoentzat "Zergatik egiten dugu gizonok eraso? Zer egin egiteari uzteko?" saioa, Gizonenea, Zipriztintzen eta Toka-ko kideekin.

10:00etan hasiko da "Bizitza burujabetza: alternatibak ezagutzen eta saretzen" saioa ere. Bertan, "Euskal Herri osotik dagoeneko beste klabe batzuetan lanean ari diren esperientziak ezagutzeko aukera ere izango dugu", adierazi dute. Ondorengo proiektuak izango dira, besteak beste: Etxebizitza alorrean Abaraska, elikaduran Orduña, lanean Mbolo kooperatiba, energian Garesko errota, finantza etikoetan Koop57 eta elkarbizitzan Arteako Venta.

Larunbat arratsaldean ere hiru saio izango dira aldi berean 16:00etan hasita:

Batetik, mahai-ingurua “Behetik eraldatzen, mugimendu txuri klase ertainekoetatik?”. Gonbidatuak: Mugimendu feministako ekintzaile kolonbiar Gladys Giraldo, Ongi etorri errefuxiatuak eta Feministaldiko kide Anabel Sanz eta Munduko emakumeak "Babel"-eko Afaf Al Haoui.

Joxemi Zumalabe Fundazioak herri mugimenduen borroka moldeei buruzko tailerra egingo du. "Eztabaidagai gatazkak, biolentziak eta aliantzak".

Eta Bizitza burujabetza gaia jorratuko dute Amaia Oleaga, Andoni Egia eta Beñat Irasuegik "Lurraldearen birjabetza: herri boterea bizitzarako espazioak berreskuratzeko" saioan.

Azkenik, igande goizean bi saio izango dira, 10:00etan hasita:

Kataluniako prozesuari buruzkoa bat, "Euskal herrigintzarako ikasgaiak". Gonbidatuak CUPeko idazkaritza nazionaleko Iígo Robredo, Zergatik ez? kolektiboko Unai Apaolaza eta Sortuko Pello Otxandiano.

"Jendarte likidoa, militantzia likidoak?" saioa izango da bestea. Eraginkortasuna, konpromisoa eta antolaketa ereduak izango dituzte hizpide Bilgune Feministako Saioa Iraolak eta Txomin Poveda soziologo eta militanteak.

Autoeraketa esperimentua

Larunbatean gogoetarako aurrez aipatutako saioen ostean, 19:00etan hasita, "konspirazio erraldoia" egingo dutela jakinarazi dute prentsaurrekoan Lurralde Askeako kideek. "Euskal Herri osoko jende saltseroa batuko garenez, ezin genuen galdetu eta saiatu gabe gelditu. Antolatuko al dugu zerbait elkarrekin datorren udaberriari begira?". Adierazi dute saio bat egingo dutela hiru galderaren inguruan: Zer? Nola? Eta Noiz?

Donostian Bizitza Da Handiena dinamika abiarazi zuten eragileetako kide ugarik dinamizatuko dute saioa eta jakinarazi dute denen gogoeta kolektibotik aterako dela emaitza, aurretik ez dagoela erantzunik pentsatuta.

Kontzertuak, antzerkiak eta performanceak

Kontzertu eta emanaldiak ere izango dira asteburuan Zubietan: Ostiral gauean Erradikalak gara! antzezlana izango dute afalostean, larunbat bazkalostean Nerea Arriola aktorearen Buruhausteak bakarrizketa, arratsaldean Thoreauren inguruan musika poesia eta misterioa performancea eta larunbat gauean bi kontzertu: Pobresiak eta Rukula.


Igandean erraustegiaren aurkako borroka erdigunera

Igandean, bazkalostean, erraustegiaren aurkako borrokak hartuko du protagonismoa Zubietan beste behin ere. 16:00etan aitortza egingo diete aurreko legegintzaldian instituzioetan egonik erraustegia gelditu zutenei, eta ondoren, Gipuzkoa Zutik mugimenduak deituta martxa egingo dute erraustegira eta makro-kartzela egin nahi dituzten eremura.

Adierazi dutenez, jende asko espero dute eta garraio publikoan joateko dei egin diete herritarrei. Jakinarazi dute Donostian, Andoainen, Lasarte-Orian eta Usurbilen deialdi lokalak egingo dituztela jendea elkarrekin joateko. Horrez gain, Lasarte-Oriara autobusak eta trena badirela gogoratu dute, eta bertatik 15 minutura dagoela oinez Zubieta.


Aniztasuna zainduz

Otorduak emango dituztela jakinarazi dute eta horretarako herri jantokia antolatuko dutela "elikadura burujabetza ipar". Prezioak "herrikoiak" izango direla adierazi dute.

Aurreratu dutenez, euskara izango da hizkuntza lehenetsia, eta saio guztietan itzulpengintza bermatuta izango dute euskaraz, gaztelaniaz eta frantsesez, "bakoitzak erosoen duen hizkuntzan hitz egin dezakeela bermatzeko".

Egitarauaz gain, nabarmendu nahi izan dute adin guztietako jendearentzat pentsatu dutela asteburua. "Haurrentzat uneoro jolas libreak izango dira: eskulanak, antzerkia sortu, mozorroak..."

Bideo hau egin dute haur eta gurasoei kanpaldira joateko dei eginez.



Lotako zakua, kanpina, musika tresnak eta bizipoza eramatera deitu dute jendea. Kanpaldia Zubieta herrian bertan izango da –ez erraustegiaren eremuan–, eta lotarako kanpingak jartzeko bi belardi antolatuko dituztela jakinarazi dute. Dutxak eta garbiketarako instalazioak izango dira. Furgonetetan doazenentzat aparkaleku berezia prestatuko dutela esan dute.

Antolatzailea: Lurralde Askea

Prentsaurrekoan adierazi dutenez, kanpaldia Lurralde Askea kolektiboak sinatzen du, "Ongi Bizitzearen euskal errepublika ipar duten lagunen kolektibo txikia". Proiektua ezagutzen ez duenarentzat, horrela definitu dute beren jarduna: "Konpromisoetan oinarritutako desobedientzia zibila eta ohiturei desobedientzia planteatzen dugu bide bezala". Hala ere, argi utzi nahi izan dute kolektibo txikia dela eta herrigintzako beste esparru askotan lanean ari diren askorekin batera ari direla prestatzen kanpaldia.

2018/09/04

Zorionak Donostia, gaztetxe berria lortu duzue!

Domekatik aurrera gaztetxe berria dago Donostiko parte zaharrean. Zorionak ba Donostia!


Gazteek irailaren 2ko goizeko 10:30 aldera ireki zuten eraikina. Hamar urtez hutsik darama eta ikastola zaharra izanik auzoko jende gehiena bertatik pasa da eta horregatik “bertara itzultzea” erabaki dute.

Hiria donostiarrak ez direnentzat berreraikitzen ari direla salatu dute eta “laster ezinezkoa” bihur daitekeela alde zaharrean bizitzea. Horrelako espazioaren helburua saretua egotea da, edozein eraso saihestu ahal izateko hezkuntza eta aisialdi askatzailea eskuragarri izateko eta auzotarren beharrak identifikatu eta asetu elkarlana landuz.

Auzoko jendeak espazio baten beharra sentitzen zuen (aisialdi taldeak, guraso elkarteak, gazte asanbladak edo auzo elkarteak). 2014an auzo elkarteak udaletxeari eskatu zion Kaialde eraikina auzoetxe bilakatzea. Udalaren erantzuna izan zen goi mailako heziketarako ezinbesteko eraikina zela. Lau urte pasa ondoren gazteek eraikina okupatu dute.

Hemen gazteek kaleratutako agiria:

10 urte daramatza hutsik Kaialdek, auzoko haurren eskola izateari utzi zionetik, bertatik pasatu ginen auzoko gazte gehienak eta bertara itzultzea erabaki dugu orain. Aspaldidanik izan ditugu auzoan espazio faltaren inguruko lanketa eta eskaera ezberdinak (gazte asanbladak, astialdi taldeak, guraso elkarteak edo auzo elkarteak) Kaialde bera 2014ean auzoetxe moduan erabilia izateko eskatua izan zen auzo elkartearen eskutik, ezinezkoa zen udalaren hitzetan, behar-beharrezkoa zen lanbide heziketa zentro bat atondu behar baitzuten bertan.

Orduandik bestelako zurrumurruak zabaldu dira, zaharrentzako etxebizitzak egingo zituztela azkena, Alde Zaharreko etxebizitzen 20%a hutsik daudenean, edozer gauza auzoaren behar eta eskariei jaramon egin aurretik! hasieran esan bezala eraikinak ez baitu inolako erabilerarik izan azken 10 urteetan.

Hemen hezi ginen eta hemen hezten jarraitu nahi dugu, kolektibotasunean eta autogestioan. Baina baita proiektu kapitalisten oposizioan, argi izan dezagun horrelako espazio eta proiektuek ez dutela luze irauten elkartasuna antolatu ezean. Maravillasek egindako erresistentzia eta jasotako babesa izan daitezen abiapuntu!

Sistema kapitalista heteropatriarkalak eta honen biziraupenaren berme diren instituzio eta alderdi politikoek Donostiaren, auzoaren eta auzotarron interesekiko berezko aurkakotasuna dute, Nork uka lezake auzoa zein Donostia elite ekonomikoaren esku utziz eta berau salerosiz gutxi batzuk aberasten ari direla? Nahiz eta honek auzotar gehienontzat arazoak bakarrik sortzen dituen? Nola azaldu bestela Kortxoenea Gaztetxearen desalojoa? Metroa, Errauskailua eta AHT-a? Nola azaldu gure kaleetako Hotel eta turisten inbasioa? komertzio txikiaen desagerpena? Ordainezin bihurtu diren alokairuen garestitzea (m2=4.280€)? edota haurrek Plaza Berrian ezin jolastu ahal izatea?…

Hiria berreraikitzen ari dira, baina ez Donostiarrontzako, guk hemen ez degu lekurik; jadanik auzotarrontzat bizitza bertan egitea zentzugabea bada, laster ezinezko ere bihurtu daiteke.

Guzti honen aurkako borrokan Alde Zaharreko Gaztetxearen okupazioa (kanpandegi kaleko 2. zenbakian) aurrerapausu esanguratsu eta iraunkorra izatea espero dugu Honela mugimendu sozial guztiek haien esku izango dute batetik beren beharrentzako azpiegitura bat eta bestetik proiektu askatzaile bat eraikitzeko elkargune bat, Alde Zaharrean, Donostia Kapitalistenaren bihotzean.

Auzoaren eta auzotarron autogestioa helburu, horrelako espaziorik gabe ezinezko bihurtzen delako: edozein eraso saihestu ahal izateko saretuta egotea, hezkuntza eta aisialdi askatzaile bat eskuragarri izatea (taberna eta pintxoez haratago ) edota auzotarron beharrak identifikatu eta asetzeko elkarrekin alternatibak bilatzen hastea.

Honek guztiak egiten baitu Gaztetxe bat, espazioak baino “mundua ulertzeko modu batek”. Eutsi munduko borrokalari guztiok! Gerturatu zaitezte Asanblada irekira 16:30, Kanpandegi kaleako 2. atarira guztion artean proiektuari forma eman diezaiogun !

Soilik antolakuntzaz egingo dugulako posible! Autogestioaren ufadak dabiltza kai aldetik!

2018/09/03

Berriz ere zabalik!

Merezitako deskantsua eta gero, hemen gaituzu berriz ere kaña emateko gogoekin!!!
Beraz, bariku hontatik aurrera, betiko lekuan elkartuko gara:

Barikuero // 18:00-20:00 // Ekoetxean (Pilota Kalea 5)

Ointxarte!


Tras unas merecidas vacances, volvemos con todas las ganas y la ilusión de siempre!!!
Asi que, desde este viernes, nops vemos en el mismo sitio de siempre:

Todos los viernes // 18:00-20:00 // Ekoetxea (c/Pelota 5)

Hasta ahoraaaa!